CEBU, Philippines - Naglunang sa kaugalingong dugo ang usa ka lalaki kini human naunay sa iyang giduwaang armas sa miaging gabii diha sa Sta. Lucia Village sa barangay Kasambagan.
Ang namatay mao si Pablo Rivera, 26, molupyo sa sitio Panagdait sa nahisgutang barangay.
Si Rivera kauban nilang Jhufel Saraosos ug Bryle Luna nga nag-inom sa balay sa kanhi polis nga si SPO2 Protacio Villarin.
Matud pa nila nga nananghid si Rivera nga mangihi ug migawas kuyog ni Saraosos, apan nahibulong si Saraosos pagkahuman nila og pangihi nga nagbitbit na og armas si Rivera.
Sumala pa nga kalit gikasa niini ang maong armas dayong tion sa iyang tuong tampihak ug mi-ingon nga “ako testingan og mabuto ba ni.”
Si Saraosos nga nakuyawan daling mitambag kang Rivera nga dili duwaan ang armas tungod kay delikado kini apan diha-diha nakablitan ni Rivera ang gato ug mibuto tumong sa tampihak niini ug natumba kini sa yuta.
Ang kanhi polis nga si Villarin pagkadungog sa buto sa armas daling misusi sa dapit ug mao nalay iyang nakita si Rivera nga nagbuy-od na ug ilang gitabang pagdala sa Cebu City Medical Center, apan dangtan usa ka oras nakabsan kini sa kinabuhi.
Matud pa ni Luna nga sa wala pa ang hitabo, tunga-tunga sa ilang panag-inom miestorya si Rivera kabahin sa iyang kasubo sa nahitabo sa ilang relasyon sa iyang kapuyo nga milarga og Manila.
Nakuha sa crime scene ang kalibre .38 rebolber nga may duha ka buhing bala ug usa ka kabhang. (BANATNEWS)