2 ka lalaki gipamusil sa Lapulapu

CEBU, Philippines - Duha ka tawo ang gipamusil sa managlahing lugar sa dakbayan sa Lapulapu kagahapon sa kaadlawon.

Unang pagpamusil nahitabo alas 2:30 kagahapon sa kaadlawon diha sa sitio Mahayahay sa barangay Bankal dakbayan sa Lapulapu nga diin usa ka Epefanio Libre, 32, taga sitio Suba Masulog barangay Basak dakbayan sa Lapulapu ug usa ka elevator technician ang nabiktima.

Base sa imbestigasyon ni SPO2 Rolito Jumao-as sa kapolisan sa Lapulapu, nagmaneho sa iyang motorsiklo si Libre padulong pauli sa ilang panimalay sa dihang gisundan kini sa duha ka tawo nga nagmotorsiklo.

Pag-abot sa maong dapit kalit gipusil si Libre sa duha ug naigo sa dapidapi ug gidala sa Lapulapu City Hospital ug gibalhin sa Vicente Sotto Memorial Medical Center. Ang mamumuno daling nakapalayo sa maong dapit.

Samtang laing biktima sa pagpamusil nahitabo mga alas 2:45 kagahapon sa kaadlawon didto sa Purok Caimito sa Canjulao sa samang dakbayan.

Ang biktima mao si Gestoni Cabalhug, 20, residente sa maong dapit nakaangkon og samad pinusilan sa tiyan human gipusil sa duha ka wala mailhing lalaking nagmotorsiklo.

Ang biktima naglakaw niadtong tungura dihang kalit nga gipusil apan wala pa masuta sa kapolisan kun unsa ang motibo sa mga kriminal. (BANATNEWS)