CEBU, Philippines - Gidepensahan ni Assistant Ombudsman for the Visayas Virginia Palanca Santiago ang iyang labaw nga si Ombudsman Merceditas Gutierrez gikan sa pagsaway labot sa daling pagpahamtamtang og unom ka bulang suspensyon sa unom ka mga dagkong mga opisyales sa Commission on Elections sa Manila.
Ang mga pagsaway nagagikan sa mga kritiko sa ombudsman dinhi sa Sugbu nga miingong walay nahimo si Gutierrez sa imbestigasyon sa gihulagway nilang anomalya sa Kapitolyo.
Matud pa ni Santiago nga dili angayang basulon si Gutierrez sa kalangay sa dagan sa kaso batok ni Gobernador Gwendolyn Garcia ug mga kaubang mga opisyales sa Kapitolyo may kalambigitan sa pagpalit sa sa dul-an sa P100 milyones nga lote sa Tinaan, Naga nga nalubog sa tubig dagat ug kabakhawan ug ingon man ang giingong anomalosong pagkatukod sa P800 milyones nga Cebu International Convention Center (CICC).
Sumala pang Santiago, ang maong mga kaso wala pa maabot sa buhatan ni Gutierrez tungod kay anaa pa kini sa ilang buhatan ug padayon pang gi-finalized sanglit gipaabot pa nila ang pipila ka mga dokumento sa maong mga kaso.
Hinuon gipahibawo ni Santiago nga kanunay siyang miadto sa Ombudsman Manila ug nagpadayon sa pagsuna sa mga dokumento nga angayan nga pirmahan ni Gutierrez.
Si Santiago miingon nga may mokabat 2 mil ka mga papeles gikan sa Visayas Ombudsman ang pirmahanan ni Gutierrez apil na niining mga kaso nga gipasaka batok sa mga opisyales sa Kapitolyo.
Apan gitataw ni Santiago nga hangtud karon wala pa sila’y ikabutyag sa kalamboan sa maong mga kaso. (BANATNEWS)