Bus nga padung south nasangit sa wire

CEBU, Philippines - Usa ka bus ang nasangit sa wire sa Visayan Electric Company (VECO) kagahapon sa hapon diha sa national highway sa barangay South Poblacion, dakbayan sa Naga.

Hinuon walay gikatahong naangol sa maong insidente gawas sa windshield ug decorative light sa bus nga nangabuak.

Si PO2 Kent Cabrera ang duty desk officer sa City of Naga Police Station nga nahinabi sa Banat News kagahapon mibutyag nga si Allen Hisoler, taga lungsod sa Samboan ug drayber sa Sun Rays Bus nga nagtangag sa plakang GWD-522 mianha sa ilang buhatan nagpa-blotter sa maong hitabo.

Matud ni Cabrera nga si Hisoler nagkanayon wala siya makabantay nga dunay wire sa VECO ang nayungyong hinungdan nga nasangit ang iyang bus.

Si Cabrera nagkanayon nga dunay mga sakop sa VECO ang nagkutay og wire diha sa mga poste sa lugar ug posibleng atol sa insidente nag-snacks ang mga lineman o ba kaha mipahuway hinungdan nga walay bisan usa nga nakit-an si Hisoler aron maoy iyang mareklamohan.  (BANATNEWS)