CEBU, Philippines - Gikalipay ni Gob. Gwendolyn Garcia ang pag-umol ni Cebu City Mayor Michael Rama sa seven-man committee nga maoy gitahasan sa pagtuon sa panagsabutsabot sa Kapitolyo aron mahatagan og kasulbaran ang problema sa land swap deal sa lote sa 93-1.
Apan giklaro ni Garcia nga ang Kapitolyo magmatngon na pag-ayo niining mga tungura sa pagpakignegosasyon sa mga representante sa siyudad sa Sugbu.
Kini aron di na masubli pa ang pagkapaso sa uwahi nilang negosasyon sa kanhi mayor ug karon Cebu City South District Kongresista Tomas Osmeña labot sa pagbinayloay og lote sa siyudad.
Napakyas ang maong negosasyon human wala motugot ang Konseho sa dakbayan nga kaniadto gipangulohan ni Rama isip bise mayor ug maoy presiding officer sa konseho.
Si Garcia nagkanayon nga sa pagkakaron ila unang siguruhon nga ang makig-negotiate sa Kapitolyo may posisyon o opisyal sa siyudad o representante nga gihatagan og appointment o ba kaha authorization gikan sa konseho sa siyudad.
Ang gobernadora miingon nga ang Kapitolyo dili gyud makig-estorya sa laing mga tawo gawas lamang sa gihatagan og authorization aron maklaro ang koneksyon sa city hall ug sa Kapitolyo.
Sa pagkakaron ang gobernadora mitug-an nga nagpaabot na lamang sila kun unsa ang tubag sa kagamhanan sa siyudad sa Sugbu labot sa land swap deal.
Apan iyang gitataw nga nakakita siya og kahayag nga masulbad gyud ang maong problema gumikan sa gipakitang interes ni Rama ug pagbarog sa naulahi sa iyang desisyon. – BANAT NEWS