CEBU, Philippines - Nawingig ang apapangig ug misirit ang dugo sa dunggan ug ilong sa usa ka ulitawo human siya tabangi og kulata sa mga bugaw sa dalan Colon dakbayan sa Sugbo kagahapon sa alas 4:30 sa kaadlawon.
Ang biktima mao si Bidasto Gorindola, 35, ulitawo nga taga dakbayan sa Ormoc.
Matud pa sa biktima nga una siya kulataha sa mga bugaw, usa ka babaye ang miduol kaniya ug mihangyo nga magpakighilawas.
Apan iyang gibalibaran kay gawas nga gikapoy siya, gamay ra usab siya og kuwarta.
Unya gumikan kay wala siya makighilawas, gipangayoan na usab siya og kuwarta, apan iya na usab nga gibalibaran tungod kay apiki siya sa kuwarta hinungdang nasuko ang babaye.
Taudtaod miduol ang upat ka lalaki nga mga bugaw kinsa gisultihan sa babaye ug gipangayoan na usab siya og kuwarta, apan dihang iyang gibalibaran ang grupo, gitabangan siya og kulata niini.
Mihuboy ang iyang walang apapangig, ug misudlot ang dugo sa iyang walang dunggan ug ilong.
Matud pa sa biktima nga dihang nakalugar siya midagan siya hinungdan nga nakaikyas siya gikan sa mga bugaw
Ang biktima mibutyag sa Banat News nga miadto siya sa Colon kay nangita og painit kay bag-o pa siyang midunggo sa Pier 3 ning dakbayan sa Sugbo gikan sa Ormoc.
Mianhi siya sa dakbayan kay mangaplay og trabaho paingon sa gawas sa nasud.
Matud pa niya nga walay mga polis ug mga barangay tanod ang Colon duol sa Cinema Theater dihang gikulata siya sa mga bugaw. – BANAT NEWS