CEBU, Philippines – Nadakpan ang duha ka kawatan human masakping misuway og kawat sa bag sa usa ka abogado sa Public Attorney's Office (PAO) didto sa Emall sa barangay Pahina Central, ning dakbayan sa Sugbo sa miaging hapon.
Ang nagtingkagol na karon sa prisohan mao sila si Noe Go, 23, nga taga sitio Huyong Huyong, sa Alaska Mambaling, ug Rey Jacalan, hingkod nga taga barangay Sambag Uno, ning dakbayan.
Ang hapit mabiktima mao si Atty. Jeffrey Badiles nga usa ka abogado sa PAO kinsa nadestino sa lungsod sa San Fernando, ug syudad sa Carcar.
Sumala sa kapolisan nga naglakaw ang biktima sa nahisgutang lugar dihang ang duha ka suspetsado mihinay-hinay pag-abli sa iyang backpack.
Apan abtik kaayong nakuwelyuhan sa biktima ang duha ug dihang misuway kini og lugnot, misiyagit ang biktima sa pagpangayo og panabang.
Gumikan sa maong singgit, nadunggan sa duha ka kawani sa CITOM nga sila si Dondson Rivera ug Elustrisimo Alberto Jr. kinsa miresponde dayon ug maoy nakasikop sa mga suspetsado.
Ang duha ka suspetsado giturn-over dayun ngadto sa buhatan sa Cebu City Police Office ug gibalhug dayon sa prisohan.
Nasakmit gikan kanila ang usa ka tickler nga nagkantidad og P120. (BANAT NEWS)