Drayber gipusil abaga ug liog samdan

CEBU, Philippines – Samdan sa mga bala ang liog ug abaga sa usa ka drayber sa traysikad human kini pusila sa wala hiilhing kriminal didto sa sitio Santo Niño, barangay Duljo – Fatima ning dakbayan sa Sugbo sa miaging hapon.

Ang biktima nailhan nga si Jeppy Ramos, 24, drayber sa traysikad nga taga sitio Omega, barangay Sawang Calero ning dakbayan.

Miasoy ang biktima ngadto sa kapolisan nga naghatod siya og pasahero niadtong higayona dihang kalit lang mipatim-aw ang kriminal sa karsada dayong pusil kaniya.

Maayo nalang kay wala masabak ang iyang bagulbagol ug nakapangayo dayon siya og panabang sa iyang igsoon kinsa maoy mihatod kaniya ngadto sa Cebu City Medical Center.

Gipangita pa karon sa kapolisan ang kriminal.