Tulisan sa taksi mga minors, 'dakpan

CEBU, Philippines - Nasikop sa kapolisan ang lima ka minor de edad nga sakop sa gang lakip ang usa ka babaye nga gitumbok nga maoy mitulis ug mipatay sa usa ka taxi driver diha sa barangay Tingub dakbayan sa Mandaue sa milabay’ng Miyerkules sa kaadlawon.

Ang mga nasikop mao sila Ronie Ranile alyas Ronron, 18, residente sa Casuntingan dakbayan sa Mandaue, duha ka 17-anyos (usa niini maoy nagpusil sa biktima) ug usa ka 15-anyos nga babaye pulos mga residente sa Tipolo ug Maguikay dakbayan sa Mandaue.

 Ang upat ka mga suspetsado nasikop sa mga sakop sa Investigative and Detective Management Branch ug Criminal Intelligence Branch sa Mandaue City Police Office pinangulohan nila ni Chief Insp. Elmer Fernandez, Insp. Ramil Morpos, Insp. Zosimo Jabas, SPO1 Arnulfo Quiachon ug mga kaubanan atol sa ilang hot pursuit operation sa milabay’ng adlaw.

 Si Ranile sa pakighinabi sa Banat News mitug-an nga sa milabay’ng Martes petsa 20 ning bulana nagsaulog siya sa iyang ika-18 nga adlaw’ng natawhan uban sa mga kauban sa ilang gang.

Apan dihang nakulangan sa ilang pang-inom sa iyang panimalay milakaw sila ug misakay sa usa ka taxi sa biktima nga si Modesto Heligao (biktimang taxi driver nga gipusil patay).

 Sa dihang mikanaog na sila sa Tingub, ang usa sa 17-anyos nagpabilin sa taxi ug kalit mitulis ni Heligao ug pagkahuman gipusil kini. Ang gitumbok nga mipusil dihang gipangutana sa Banat News miangkon usab sa iyang gihimo kang Heligao.

Sumala pa niya nga nasuko siyang P200 lang ang gihatag ni Heligao dihang iyang gitulis ug misuway pa og wakli sa iyang kalibre 38 nga armas hinungdan nga iyang napusilan.

 Ang maong 17-anyos miklaro nga walay labot ang iyang mga kauban sa iyang gihimo ug mitug-an nga mao pa kini ang unang higayon nga mihimo siya sa maong krimen.

 Si Chief Insp. Fernandez nagkanayon nga nakadawat sila og impormasyon gikan ra usab sa mga kauban sa mga suspek nga nakahibalo sa hitabo ingon man sa duha ka driver nga nakakita sa mga suspetsado human sa pagpanulis

 Samtang si MCPO director Sr. Supt. Noel Gillamac mihulagway nga hanas na sa pagpanulis ang mga dinakpan ug posibleng nalambigit na sa ubang kaso sa pagpanulis sa mga taxi sa Metro Cebu.   – BANAT NEWS