CEBU, Philippines - Gihulagway ni Gob. Gwendolyn Garcia nga security breach ang gihimo ni Bise Gob. Gregorio Sanchez nga pagbutyag sa tinuoray nga gidaghanon ug mga pangalan sa iyang mga police escorts sa publiko.
Sumala pa ni Garcia confidential man unta ang butang nga susama niini gumikan kay magbutang kini sa peligro sa kinabuhi sa mga public officials.
Gikwestyon karon ni Garcia ang pagtuki ni Sanchez sa iyang security details tungod kay sa higayon nga may dautang mahitabo kaniya, si Sanchez makabenipisyo tungod kay siya na man unya ang molingkod isip gobernador.
Ang gobernadora nagkanayon nga natandog kaayo siya sa gipakitang concern ni Sanchez ngadto sa iyang seguridad ug pagsugyot sa iyang anak nga si Paolo Garcia mamahimong consultant on security matters hinungdan nga iyang gikonsiderar ang sugyot.
Apan dili niya ipailawom sa iyang buhatan si Paolo kondili diha sa buhatan ni Sanchez.
Giklaro ni Garcia nga kun mahimo pa lamang nga dili na lamang siya butangan og police security iyaha kining himuon apan responsibilidad man kini sa kapolisan nga siya bantayan.
Si Garcia mideklarar og "all out war" batok sa mga rebeldeng sakop sa New Peoples Army ug mga drug dealers. (BANAT NEWS)