Negosyante Gitipi sa 3 Tulisan

CEBU Philippines - Naglunang sa kaugalingong dugo ang usa ka negosyante og construction supply human gipusil patay sa tulo ka wala mailhing tulisan nga nagmotor pasado alas-7 sa miaging gabii sa barangay Poblacion syudad sa Toledo.

Ang biktima nailhan nga si Proceso Anonas, 48, molupyo sa nahisgutang lugar samtang padayon pa ang kapolisan sa pag-ila sa tulo ka lalaking responsable.

Base sa imbestigasyon sa kapolisan sa syudad sa Toledo mao pay pag-abot sa biktima luwan sa iyang motorsiklo gikan sa iyang tindahang Four Star Hardware sa mao gihapong barangay ug nagbitbit og backpack padulong sa ilang panimalay dihang nahitabo ang tulis.

Matud pa nga sa pagkanaog niini gibabagan kini sa tulo ka wala mailhing tulisan ug giilog ang backpack sa biktima.

Ang biktima nagdumili paghatag niini hinungdan nga gipusil kini makaduha ka higayon sa iyang tuong dughan ug tuong abaga. Ang biktima daling gidala sa Toledo District Hospital apan gideklarar kini nga dead on arrival, samtang ang tulo ka tulisan dali usab nga misibat human sa panghitabo.

Sa pagsusi sa kapolisan sa patay’ng lawas sa biktima ang anak niining lalaki maoy ilang gipakuot sa bulsa niini ug diha marekober ang kwartang nagkantidad og P177, 380.

Samtang nasayran sa kapolisan nga ang sulod sa backpack ni Anonas nga nakuha sa tulo ka tulisan mao ra ang usa ka bawnanan sa kan-on, blank check books, PNB bank books nga may time deposit nga nagkantidad og duolan tunga sa milyon, Metro Bank certificates nga nagkantidad og tunga sa milyon, PNB Certificates ug long term deposit sa maong bangko nga nagkantidad og usa ka milyon, pipila ka tseke gikan sa iyang mga kliyente ug mga sensilyong nagkantidad og P2 mil ug gituohang pipila ka dokumento.

Sa pakighinabi sa Banat News kang SPO4 Gil Lastimosa kini mibutyag nga ang biktima maoy usa ka dagkong negosyante sa nahisgutang lugar.

Matud pa ni Lastimosa nga base sa gibutyag sa mga saksi ang tulo ka tulisan nagtabon sa ilang mga nawong luwan sa usa ka motorsiklo ug daling miikyas human sa hitabo. (BANAT NEWS)