Nanggukod og silingan gipatay

CEBU, Philippines - Patay diha-diha ang usa ka 49-anyos nga mag-uuma human kini gipusil nga nakatalikod sa sentro sa luyo sa iyang ulo samtang naglakaw   paingon nga motambong og disko sa barangay Cangdampas lungsod sa Barili niadtong Biyernes sa alas 8:30 sa gabii.

Ang biktima mao si Calixto Lacustalis Rodaje, 49, mag-uuma ug molupyo sa nahisgutang lugar, samtang ang suspek mao si Isidro Jakosalem alyas Jovi, 24, nga usa ka mag-uuma ug nagpuyo sa maong lugar.

Matud ni PO3 Job Sarveda sa Barili Police dihang nahinabi sa Banat News ang biktima paingon nga motambong og disko sa sikbit nga barangay ug samtang naglakaw sa barangay road wala kini makabantay nga gisundan kini sa suspek.

Dihang naabot siya sa mingaw nga dapit gipadul-an kini sa suspek dayun gipusil sa ulo gamit ang wala matinong kalibre sa armas ug pagkahuman dihang nahagba na sa yuta nagdaling misibat pahilayo ang suspek.

Subay sa imbestigasyun sa kapulisan panimalos ang motibo sa krimen sanglit ang amahan sa suspek sa wala pa ang hitabo nianang pagka-adlawan pa gigukod og sundang sa biktima atol sa ilang lalis.

Dugang nahipos nga impormasyon labihang sukoa sa suspek human niini mahibaw-ing gigukod ang iyang amahan ug nanganti kining manimawos.

Ang kapulisan padayon pa sa ilang manhunt operation pagsikop sa nagtago-tago nga suspek nga daling nakasibat human sa hitabo.

Sa paghimo ning balita gitakda pang ipaubos sa autopsy ang patay’ng lawas sa biktima nga gihulagway’ng nalungag ang luyong bahin sa ulo nga maoy naigo sa pagpamusil. (BANAT NEWS)