Batang 'tulisan' miinsister sa pasangil vs. 3 tanod

CEBU, Philippines - Hugtanon gyud nga gibarogan sa 16-anyos nga batang lalaking gitumbok nga tulisan nga ilang protektor ang hepe sa mga tanod sa barangay Carreta ug kauban niining duha ka tanod.

Sa pakighinabi sa Banat News sa hepe sa Theft and Robbery Section (TRS) Sr. Insp. Bonifacio Garciano, gitumbok sa batan-on sila si Ernesto Villaflor alyas Tatay Erning ang hepe sa mga tanod, Allan Obenia ug Alex Regis nga maoy ilang protektor.

Matud pa ni Garciano nga gibarogan sa menor de edad ang iyang nahaunang gibuhiang pamahayag ngadto sa mga tigbalita sa miaging adlaw, gani sa ilang panag-atubang sa iyang buhatan kagahapon gitudlo gyud silang tulo sa maong bata, hinuon ang tulo kusganong mihimakak niini.

Ang bata inabagan unya sa abogado o ginikanan pasumiteron og extra judicial affidavit aron ilang magamit batok sa tulo aron mapasakaan og kaso nga naglakip sa child abuse ug kasong robbery.

Si barangay kapitan Eduardo “Boloy” Lauron nga nakahinabi sa Banat News mipadayag nga wala siyay kalibutan sa personal nga kalihukan sa iyang mga barangay tanod.

Apan andam niyang buhi-an ang iyang tulo ka barangay tanod kun kini mapamatud-ang protektor sa mga kawatan sa maong dapit. Matud pa ni Lauron nga dako ang iyang kahiubos sa maong balita.

“Unsay sakto mao nay atong barogan, ipatigbabaw gyud na natong maayo kay sa bati. Nagka-estorya mi unya gi-ingnan na nako sila nga dili ko modupa ninyo, paningkamot mo, ako wala gyud koy dapigan basta magbinuang nakong tawo. Ako maayo ko sa mga tawong maayo pero ug maghatag gani og bati, mag-iyahay nalang mi og dalan,” matud pa ni Kapitan Lauron.

Samtang wala nadayon kagahapong adlawa ang pagpa-ubos og drug test sa tulo gumikan sa kakulian sa kapolisan apan ang tulo ka mga tanod andam usab nga mopaubos niini.

Ang maong bata mitug-an nga senyasan sila sa maong mga tanod pinaagi sa flashlight kun dunay mosulod nga mga polis sa dapit sa ilang gitagoan maong kanunay silang makaikyas. (BANATNEWS)