CEBU, Philippines - Namatay ang usa ka suspetsadong tulisan human kini pusila sa wala hiilhing kriminal didto sa sitio Mananga, barangay Tabunok, dakbayan sa Talisay niadtong Martes sa gabii.
Ang biktima giila nila ni PO3 Arnold Damasco ug PO2 Leandro Azarcon nga si Aide Prajes nga taga Mananga.
Si Azarcon nga nahinabi sa Banat News kagahapon mibutyag nga si Prajes usa sa mga suspek sa mga tulis nga nahitabo sa barangay Mananga.
Matud pa ni Azarcon nga si Prajes nagbarog duol sa ilang balay dihang kalit lang mitungha ang usa ka wala hiilhing lalaki nga mipusil sa biktima.
Nasabak sa walang bahin sa tiyan, ang biktima daling gihatod ngadto sa Talisay City District Hospital apan gibalhin kini ngadto sa Vicente Sotto Memorial Medical Center diin didto siya makabsi sa kinabuhi.
Ang kapolisan wala pay nahipos nga impormasyon kabahin sa motibo sa maong pagpamusil. – BANAT NEWS