Balay sa magtiayong reporter gilungkab

CEBU, Philippines - Balay sa magtiayong sakop sa media gihabwaan sa ilang kabtangan human mabiktima sa pagpanglungkab diha sa barangay Sambag 1 ning dakbayan.

Ang nabiktima mao sila si Erwin ug Charmaine Lirazan, parehong mga reporter sa Sun.Star Superbalita nga nagpuyo sa dan M. Cabigon, Private.

Ang pagpanglungkab gituohang nahitabo alas-5 sa hapon niadtong Lunes dihang sila mipauli gikan sa trabaho. Sumala pa sa duha abli na ang pultahan sa ilang apartment ug nalangkat na ang lock niini.

Daling gisusi sa duha ang ilang lawak sa ikaduhang andana nakita nilang nautingkay na og maayo ang ilang mga gamit ug nahanaw ang itom nga HP laptop ibabaw sa computer table nga nagbalor og P27,000, duha ka mga wristwatch nga nagbalor og P14,000 ug Canon digicam.

Si Erwin mibiya sa balay ala-una sa hapon ngadto na sa alas 4 sa hapon ug nianang mga orasa gikatahong may nadunggang kasikas ang mga silingan apan nagtuo silang magtiayon ra ang naa sa sulod.         

Ang mga sakop sa Mobile Patrol Group, Theft and Robbery Section ug Fuente police station pinangulohan ni Chief Insp. Michael Bastes mikuha na og fingerprints ang mga sakop sa Crime Scene Investigation.

Nagtuo ang kapulisan nga nasuhito gyud ang kawatan sa oras nga mamingaw ang pinuy-anan sa mga biktima.  – BANAT NEWS