Kanhi konsehal sa Talisay moserbisyong libre

CEBU, Philippines - Usa ka kanhi konsehal sa dakbayan sa Talisay mipasalig nga mohatag siya sa iyang libreng serbisyo ngadto sa Talisaynon bisan wala na siya sa posisyon.

Siya si kanhi Konsehal Shirley Belleza kinsa mibutyag sa Banat News kagahapon nga matud pa wala tumana sa administrasyon sa Talisay nga siya maoy itudlong Public Information Officer (PIO) sa City Hall .

Apan iyang nasayran nga ang gihugonhugonang itudlo sa maong katungdanan mao kuno si kanhi Konsehal Arturo Bas .

Matud sa konsehala nga nagduda siya nga adunay kalabtanan ang milabay’ng eleksiyon sa maong sistema tungod kay milihay siya kaniadto sa administrasyon ug didto siya modapig sa iyang bana nga si kanhi bise mayor Aberdovey Belleza kinsa mikandidato sa pagka-bise mayor sa dakbayan ubos sa oposisyong partido.

Si Belleza nagkanayon nga siyam siya ka tuig nga nagkuyog-kuyog sa grupo sa administrasyon apan kalit lang nga nahimo siyang kaaway sa partido.

Karon ang 20 ka mga job order(JO) nga ubos sa quota ni Belleza gipanaktak na sa ilang trabaho.

Sama usab sa mga JO nga ubos sa quota ni kanhi bise mayor Belleza nga bana sa konsehala nga gipanaktak usab dihang mipadayon kini paglansar sa pagka-bise mayor sa milabay’ng eleksyon niadtong Mayo 10, 2010.

 Ang gihimong katarungan sa mga opisyal sa kagamhanan sa siyudad mao nga gumikan kay wala na sa serbisyo ang kanhi bise mayor hinungdan nga gipangtaktak nila ang mga trabahante nga ubos sa iyang quota ug gihatag na usab kini ngadto sa uban nga nagkinahanglan og trabaho.

Ang konsehala midugang nga bisan og wala na siya sa posisyon paningkamutan gihapon niya nga makahatag og serbisyo sa mga Talisaynon.

Siya maoy aktibong nagpasiugda sa mass wedding sa siyudad sa paghatag og higayon sa mga nagpuyo-puyo nga mabendisyonan ug mahimong legal nga magtiayon aron nga mahimong lehitimo ang mga anak niini. (BANATNEWS)