44 ka tawo gikalibanga sa Tudela

CEBU, Philippines - Ang Provincial Health Office sa lalawigan sa Sugbu mipahibawong miabot na og 44 ka mga tawo sagad niini mga bata ang nabiktima sa diarrhea (dili cholera base sa unang nanggawas nga balita (di sa Banat News) diha sa lungsod sa Tudela tungod sa kontaminadong tubig.

Matud pa ni Provincial Health Officer Kristina Giango nga gawas sa 25 ka mga residente sa barangay Cal-mante, lungsod sa Tudela isla sa Camotes nga nalandig sa district hospital, may mga 18 ka mga kasong wala mabutang sa listahan sa municipal health officer.

Kining 18 ka mga kasong wala maapil sa listahan mao kadtong wala na kinahanglana pang dad-on sa tambalanan human papaulia sa barangay health officer. Kagahapon dunay usa pa ka pasyente ang na-admit sa tambalan sa susamang sakit.

Si Giango nagkanayon nga kontrolado na ang sitwasyon kay napugngan na ang pagkuyanap sa kagaw nga mitakboy ngadto sa tubig nga giinom sa mga molupyo sa barangay Cal-mante tungod sa gihimong chlorination sa water system sa maong lugar.

Usa sa gitumbok nga hinungdan sa pagka-kontaminado sa tubig mao ang pagpunay og bunok sa uwan ning nanglabay’ng mga adlaw. Samtang libre ang pagpatambal sa mga pasyente ingon man ubang galastuhan sumala pang Giango.

Gihangyo ni Giango si Gob. Gwendolyn Garcia nga susihon ug monitoron sa Provincial Task Force ang tinubdan sa tubig sa water system sa maong lugar. – BANAT NEWS