Nagduwa sa kinatawo sud sa mall

CEBU, Philippines - Nasikop sa mga “house detectives” ang usa ka lalaki nga gipasanginlang nagduwa sa iyang kinatawo sulod sa usa ka appliance center sa usa ka mall sa dakbayan sa Mandaue sa milabay’ng hapon.

Ang nasikop mao si Eric (ngalan gitago), 25, nagpuyo sa Hermag Village Basak dakbayan sa Mandaue.

Samtang ang nakasikop ni Eric mao sila si Edgar Paganon ug Jacinto Opong Jr. mga house detectives sa maong mall sa Ibabao Estancia dakbayan sa Mandaue.

Base sa imbestigasyon sa kapolisan sa Station 1 sa Mandaue City Police Office nasayran nga si Eric gidala sa mga sakop sa “house detective” sa maong mall human kini masikop sa aktong nagduwa sa iyang kinatawo sulod sa ilang appliance department sa maong mall.

Matud pa ni Paganon nga mga alas 4:00 sa milabay’ng hapon nakugang ang mga saleslady dihang ilang nakit-an si Eric nga naghangos nga nagduwa sa iyang kinatawo hinungdan nga gitawag nila ang mga house detectives.

Sa pagresponde nila ni Paganon ug Opong naaktuhang nagpadayon pa sa iyang lawasnong kalipay hinungdang gisikop kini ug gidala sa Station 1 sa kapolisan sa dakbayan sa Mandaue.

Dihang gibadlong gikatahong mitubag ra kini og “tan-awa og nangawat ba” ug nangangkong igo ra siyang nagtan-aw og salida sa TV.

Apan hugot nga gibarugan sa duha ka gwardiya nga naghimo kini sa malaw-ay’ng nga binuhatan.

Matud pa ni PO2 Arthur Cuyos ang desk officer sa Station 1 nga nianang pagkagabii mireklamo ang mga kaubang binilanggo sa maong suspek sanglit giingong gitiwas niini ang naputol nga gibuhat diha sa mall. Tungod sa gibuhat sa maong suspek diha mismo sa sulod sa bilanggoan nagduda ang kapolisan nga posibleng may deperensiya kini sa pangisip.

Giingong miduol na usab sa tagdumala sa maong mall ang mga kabanay sa suspek aron mangayo og pasaylo. Matud pa ni Cuyos kung maabtan sa tukmang takna nga walay kasong ipasaka batok ni Eric kini ilang buhian. – BANAT NEWS