Memo ni Gwen sa LAP gidepensahan

CEBU, Philippines - Gidepensahan ni Gob. Gwendolyn Garcia ang iyang gipagawas nga Memorandum Order nga nagtumbok nga ang Legislative Assistance Funds kon LAP dili na magkinahanglan og resolusyon gikan sa Hunta Probinsyal.

Matud pa ni Garcia nga ang maong kamanduan wala mangahulugang usa siya ka diktador nga maoy pagtan-aw kaniya ni Bise Gob. Gregorio Sanchez.

Sumala pa ni Garcia nga ang iyang gihimo mao lang ang pagpamubo sa taas ug dugay nga proseso sa pag-release sa pundo alang sa mga barangay tungod sa kadugay sa Hunta Probinsyal nga moaprubar niini atol sa mga sesyon nga makausa lamang sa usa ka semana.

Si Garcia mipasabot nga ang iyaha lamang, makuhaan ang daghang gimbuhaton ang hunta aron makapunting sa ilang tinuoray nga trabaho nga mao lamang legislation ug dili ang pagpanghatag og proyekto nga iya sa executive department.

Matud pa ni Garcia nga iyang nasayran nga giabusohan ang pagpanghatag sa provincial board og pundo alang sa konstituwente sa mga distrito.

Gihimo niyang sanglitanan ang dili mominus sa P100 mil hangtud usa ka milyon ka pesos nga pundong gihatag ngadto sa tulo ka barangay sa Tuburan alang pagpaaspalto sa dalan nga wala mahuman.

Dugang pa sa gobernadora nga pinaagi sa maong polisiya, iyang ma-monitor kun pila ang mahatag nga pundo ngadto sa matag barangay.

Samtang si Provincial Atty. Mariano Martinquilla mitumbok nga wala gidali-dali sa gobernadora ang desisyon kay gitun-an kini pag-ayo ug gipasubay sa balaod.

Gani iyang gitataw nga ang paghimo sa maong memorandum gibase usab kini sa mga sugyot na mismo sa mga sakop sa hunta probinsyal.  – BANAT NEWS