Tag-iya'g videokihan gipusil

CEBU, Philippines - Kritikal ang kahimtang sa tag-iya og videokihan human kini gipusil sa nagmaskarang lalaki samtang nagbarog-barog kini sa gawas nga bahin sa iyang establisamento sa barangay Bato lungsod sa Sibonga niadtong Huwebes sa alas 7:00 sa gabii. Ang biktima mao si Mario Sarnillo Guarin, 40, nga molupyo sa maong lugar samtang gihulagway lang sa mga saksi ang mamumuno nga nagsuot og bonnet ug angkas sa usa ka motorsiklo nga walay plate number.

Matud pa ni SPO4 Rolando Almonicar sa Sibonga Police, ang biktima diha sa gawas dihang kalit nga miabot ang duha ka lalaking sakay sa motorsiklo ug ang angkas niini maoy nanaog dayung bunot sa armas ug gipusil makadaghan ang biktima. Ang biktima naigo sa tiyan ug sa ubang bahin sa iyang lawas ug daling gihatud sa mga silingan sa Deiparine Medical Clinic sa lungsod apan tungod sa delikadong kahimtang gilahos kini sa tambalanan dinhi sa Vicente Sotto Memorial Medical Center (VSMMC).

Ang mga polis naka-recover og tulo ka kabhang sa bala sa kalibre .45 ug usa ka deformed slug sa kalibre .45 diha sa crime scene.  – BANAT NEWS