Mga konstituwentemaoy apektado, sa pag-recall sa MCAB

CEBU, Philippines - Pag-recall sa Kapitolyo sa mga multicabs diha sa kabarangayan nakaapekto og dako sa mga konstituwente sumala pang acting Gob. Gregorio Sanchez human duna nay midangop sa iyang buhatan nga mireklamong naglisod pagdala sa ilang pasyente human kuhaa ang maong mga sakyanan kanila.

Si Sanchez mibutyag nga niadtong Biyernes, midangop sa iyang buhatan ang barangay kapitan sa Lamac sa lungsod sa Pinamungajan nga si Flor Garten gumikan kay walay sakyanang magamit ang pasyenteng ilang molupyo.

Matud pang Sanchez padulong nang mopauli ang pasyente gikan magpatambal diha sa Vicente Sotto Memorial Medical Center apan walay kasakyan pabalik sa Pinamungajan.

Si Sanchez nagkanayon nga kun wala pa unta kuhaa sa gobernadora ang multicab sa barangay dili magkalisod-lisod ang mga masakitong konstituwente sa lalawigan.

Sigon pa ni Sanchez, dili lang ang Pinamungajan ang nakasinati niini kondili lakip na ang mga bukirang barangay sa lungsod sa Tuburan. Matud pa ang mga gipangbawian og multicab migamit sa maong mga sakyanan sa ilang pamolitika.

“Please stop harassing me, kay dili man ako ang inyong gi-terrorized kundili ang mga tawo. Ang inyong kasuko akoa na lang. Apan ang serbisyo sa katawhan ayaw intawon na kuhaa aron maarang-arang unta ang ilang pagkabutang,” awhag pang Sanchez sa usa sa mga interbyu sa DyRF.

Si Sanchez nitug-an nga gihingusgan karon sa buhatan sa gobernadora ang pagguba kaniya tungod sa giingong kahadlok nga modagan siya sa pagkagobernador karong 2014 election batok sa kandidato sa One Cebu nga gihugon-hugonang si 3rd district Kong. Pablo John Garcia.

Apan dali siyang mipasabot nga subli niyang suportahan pagkagobernador si kanhi Cebu City Councilor Hilario ‘Junjun’ Davide III kun magpasubli kini sa pagdagan.

Kini tungod kay wala siya’y 150 milyones pesos nga maoy iyang nahibaw-an nga gikinahanglanon nga gahin sa election aron makasiguro nga makadaog sa pagkagobernador.

“Ug wala koy interes nga mangurakot, kutob lamang ko sa pagkabise gobernador,” panapos ni Sanchez. – BANAT NEWS