Sistema sa edukasyon sa RP mikunhod

CEBU, Philippines - Sistema sa edukasyon sa nasud dugay nang mius-os sukad pa sa Martial Law sumala pa ni Commission on Higher Education (CHED) Chairman Emmanuel Angeles atol sa pormal nga pagbukas sa Ched Building diha sa sitio Sudlon sa barangay Lahug kagahapon.

Sumala pa ni Angeles, sa milabay’ng 30 ka tuig human sa deklarasyon sa Martial Law mius-os na ang educational system sa nasud ug nabiyaan na sa ubang mga silingang nasyon.

Matud pa niini, kaniadto, ang upat ka mga dagkung unibersidad sa nasud nga mao ang De La Salle University , Ateneo de Manila, University of the Philippines ug University of Santo Tomas nahimutang sa top 100 ka mga unibersidad lukop kalibutan apan karon anaa na kini sa halos kinaiwitan.

Ang mga silingang nasud na karon sa Asya sama sa Vietnam, China ug Malaysia kaniadto ulahi sa edukasyon apan karon miasenso ang kalidad sa ilang edukasyon.

Samtang mipadayag usab si Angeles nga dili makatabang ang pagdugang og duha ka tuig sa basic education nato karon tungod sa kadaku sa gikinahanglang budget nga mokabat sa P25 bilyones.

Misugyot hinuon kini og proyektong libreng “one year pre-university” alang sa mga mogradwar sa high school una pa moadto sa kolehiyo, matud pang Angeles P10 bilyones lang maoy kinahanglanon niini.

Apan si Department of Education (DepEd-7) regional director Recaredo Borgonia suporta sa tinguha ni President-elect Senador Benigno ‘Noynoy’ Aquino nga pun-an og duha ka tuig ang basic education sa nasud. Matud pa ni Borgonia nga makaayo kaayo sa mga kabataan ang pagdugang og duha ka tuig sa elementarya ug sa high school kay mao lamang kini ang bugtong paagi nga mahimong "competitive" ang mga tinun-an sa Pilipinas.

Iyang gitataw nga ang tinun-an sa Pilipinas gamay ra kaayo og nakat-unan ikompara sa laing mga nasud tungod kay ang Pilipinas na lamang ang nahibiling nasud sa Asya nga napulo ra ka tuig ang basic education sa mga bata.

Giesplikar ni Borgonia nga kun madugangan og duha ka tuig ang elementarya mas masayo nang makat-unan sa mga bata ang subjects sa unang duha ka tuig sa high school.

Sagad sa mga minor subjects sa kolehiyo gihulagway nalang nga pag-usik-usik sa panahon og salapi sa mga tinun-an tungod kay dili man kini maoy ilang kursong gipa-enroll. (BANATNEWS)