Napunggit katulo sa sakyanan

CEBU, Philippines - Patay ang usa ka lalaki human kini napuli-pulihan og bangga ug nalatayan sa tulo ka mga managlahing sakyanan diha sa South Road sa barangay Pardo ning dakbayan kagahapon sa kaadlawon.

Ang nakabsan sa kinabuhi mao si Romeo Barrientos, 52, molupyo sa Sabellano St. sa barangay Pardo samtang talandugon usab ang kauban niining si Gideon Segusmindo, 58, molupyo sa maong barangay.

Base sa imbestigasyon sa Cebu City Police Office Traffic Division nanglabang ang duha sa maong dapit dihang kalit silang napunggit sa naghaguros nga taksi.

Sa ilang pagtugpa diha sa sementadong dalan kalit usab nga miabot ang naghaguros gihapong usa ka Nissan Sentra nga awto nga may plakang WPY-704 ug napunggit na usab sila niini.

Ang drayber sa Nissan nga awto nga si Robert Gerald Macalalad boluntaryong mitahan sa kapolisan human sa aksidente.

Si Barrientos gikatahong nalagpot og pipila ka metros gikan sa unang gikabanggaan kaniya apan adto na pud napunta sa pikas lane nga aduna say naghaguros gihapong multicab ug nalatayan gyud ang lawas niini.

Gumikan sa kagrabe sa nahiagumang kadaot sa lawas ug ulo ni Barrientos nakabsan kini sa kinabuhi samtang si Segusmindo daling gitabang ug gidala sa Cebu City Medical Center. Samtang padayon pa usab nga gipangita sa kapolisan ang drayber sa taksi nga unang nakaigo sa duha ug sa multicab nga nakalatay sa lawas ni Barrientos.   (BANATNEWS)