Bukiran pabutangan traffic signs ni Mike

CEBU, Philippines - Giawhag ni Mayor-elect Michael Rama ang mga sakop sa City Traffic Operations and Management (CITOM) nga butangan og saktong gidaghanon sa mga traffic signs ang mga bukirang barangay sa dakbayan sa Sugbo aron malikayan ang susamang trahedya nga nahitabo sa Balamban sa miaging adlaw diin 20 ka mga Iranian ug drayber sa bus ang nakabsan sa kinabuhi human natagak sa bung-aw ang bus nga ilang gisakyan.

“Papun-an gyud nato og traffic signs nga klaro aron dili maglisod ang mga drayber sa pag-agi sa kadalanan ug dili sila basta-basta magpatuyang og padagan sa ilang mga sakyanan,” si Rama sa dihang nahinabi sa Banat News kagahapon human sa gipahigayon niyang tigum sa mga opisyal sa CITOM.

Nakigtigum kagahapon si Rama sa mga dagkong opisyal sa CITOM aron tun-an ang kinatibuk-ang plano alang sa pagpahapsay sa mga nag-unang kadalanan sa dakbayan.

Sumala pa ni Rama nga buot usab niyang pabutangan og traffic enforcer ang pipila ka dapit sa Salinas Drive aron masusi kun angayan pa bang padayonon ang mga sakyanan nga buot moagi sa bukid, ilabi na ang dagkong mga bus.

Dugang pa niini nga dili siya buot nga moagi pa sa bukid ang mga gubaon na kaayong bus aron malikayan ang disgrasya sa kadalanan.

Sa laing bahin, gipineguro ni Rama nga hapsayon ang tanang kahiwian sa CITOM gumikan kay dili siya gusto nga makahugaw sa iyang administrasyon atol sa pormal niyang paglingkod isip mayor karong Hunyo 30 ug iyang ipaneguro nga matangtang gyud ang mga traffic enforcers nga kusog magbinuang sa ilang trabaho.  – BANAT NEWS