Gov. Macias namatay sa kanser

CEBU, Philippines - Mitaliwan na human sa pipila ka tuig nga pakigkombate sa sakit nga kanser sa atay si Negros Oriental Gob. Emilio “Dodo” Macias II kagahapon sa kaadlawon diha sa Kidney and Transplant Institute sa Quezon City.

Si Macias, 76, gikatahong mitaliwan alas-3 pasado kagahapon ug kini gikumpirmar sa anak niining si Provincial Board Member ug karon Dumaguete councilor Erwin Maciasnga mitaliwan na ang iyang amahan pipila ka oras sa dili pa ang schedule niining chemotherapy.

Ang gobernador nasulod sa maong tambalan sulod na sa usa ka bulan apan gisublian sa iyang mga konstituwente sa ikaduhang higayon pagka-gobernador sa maong probinsya.

Si Macias gidala sa maong tambalanan pipila ka adlaw una pa ang proklamasyon sa Board of Canvassers tungod sa maong sakit.

Si Rep. George Arnaiz sa 2nd district sa Negros Oriental mitug-an sa mga tigbalita atol sa pagsaulog sa Independence Day nga gisultihan siya sa gobernador niadtong Biyernes atol sa iyang pagbisita nga tutukan ang iyang mga proyekto.

Gihulagway ni Arnaiz si Macias nga usa ka ‘fighter’ ug iyaha kining gisultihan nga kinahanglang makabalik kini sa dili pa ang Hunyo 30 alang sa iyang pagpanumpa isip gobernador sa ikaduhang higayon sa ilang lalawigan.

 “He asked me to organize the preparations of his inauguration and oath taking, but I told him it was not necessary for him to be physically present on that day,” sumala pa ni Arnaiz sa report website sa Dumaguete Info.

“Giingnan ko ni Governor Macias nga ako maoy mo-preparar sa iyang oath taking, apan ako siyang giingnan nga pwede ra man siya maka-take bisan asa dapit sa atong nasud samtang dili pa motugot ang iyang doctor makagawas na siya sa hospital,” pasabot pang Arnaiz sa report sa The Freeman.

Sa samang website, si Erwin Macias mipahibalong i-cremate ang patay’ng lawas sa amahan karong adlawa alas-9 sa buntag sa Manila ug dad-on ang abo niini balik sa iyang probinsya.  - BANAT NEWS