Waste segregation maayong itudlo kay sa sex education - Cortes

CEBU, Philippines - Naglaraw si Mayor Jonas Cortes nga itudlo ang bahin sa waste segregation sa mga tulunghaang publiko sa dakbayan sa Mandaue sa tinguha nga makat-onan na sa mga bata ang hustong paagi sa paghipos sa basura.

Kini samtang gihangop niya ang pagkabara sa sex education nunot sa pagsupak niini sa simbahan ug uban pang sektor sa maong dakbayan.

Matud pa ni Cortes mas maayong dili na ipadayon sa Department of Education ang ilang pagpanudlo og sex education sa mga estudyante sa tulunghaang publiko.

Kini base sa pamahayag ni DepEd Secretary Mona Valisno sa iyang pagbisita sa Sugbo sa miaging semana kinsa mipadayag nga ang pagtudlo sa sex education sa elementary ug high school level giangan-angan pa sa ilang buhatan.

Matud pa ni Valisno nga bisan pa man kun nadawat na sa nagkadaiyang buhatan sa DepEd dinhi sa nasud ang module alang sa maong programa apan sa gihapon dili pa sila makapatuman kay makigtagbo pa man sila sa mga ginikanan ug sa religious sector.

Gumikan niini si Cortes nagkanayon nga maayo kaayo ang gihimong hukom ni Valisno kay alang kaniya nga mas labi pang maayo nga ang pag-atiman sa basura maoy itudlo sa kabataan aron mamintinar ang kahinlo sa palibot sa syudad.

Ang kadaghanan nagkanayon nga ang pakighilawas dili na angayan pang itudlo sa mga bata kay ang tawo mas bright pa kay sa hayop.

Ang pakighilawas daan nang bahin sa pagkatawo sa tawo ug sa mananap busa ang pagtudlo sa mga kabataan niini wala na kinahanglana.

Hinuon ang bug-at nga katarungan sa kagamhanan bahin sa pagtudlo og sex education sa kabataan, dili ang bahin sa pakighilawas.

Kini tungod kay sa paghilawas dali ra kaayo padaghanon ang populasyon sa nasud, apan ang pakighilawas nga magdala og sekreto sa pagpahinay sa pagsirit sa gidaghanon sa populasyon sa nasud maoy angayang itudlo sa eskuylahan.  - BANAT NEWS