CEBU, Philippines - Usa ka gwardiya ang napalgang patay sulod sa bakanteng lote nga iyang gibantayan kagahapon sa buntag diha sa barangay Mabolo ning siyudad.
Ang biktima nailhan sa Homicide Section sa Cebu City Police Office (CCPO) nga si Virgilio Montecillo Lucero ,48, sakop sa King David Security Agency ug kasamtangang nagpuyo sa sitio Basubas sa barangay Tipolo siyudad sa Mandaue ug lumad nga taga barangay Bagacay sa lungsod sa Sogod.
Si PO2 Michael Codaste sa Homicide Section nga nahinabi sa Banat News mitug-an nga pasado alas 8:15 kagahapon sa buntag usa ka Wenny Tormis mitubag sa sugo sa lawas dihang nakit-an niini si Lucero nga nagkaob na sa kasagbotan.
Tungod niini iyang gipahibawo ang igsuong si Gerry Tormis nga usa usab ka gwardya kinsa mao nay mitawag sa kapolisan. Matud pa ni Codaste nga uwahing nakit-an si Lucero nga nagpaso-paso pasado alas-7 sa buntag kagahapon. Ang mirespondeng mga sakop sa Emergency Rescue Unit Foundation (ERUF) mihulagway nga ‘unresponsive’ na kini. Walay nakitang foul play ang kapolisan ug narekober usab ang armas niining .38 kalibreng rebolber ug cellphone. Ang maong gwardiya gikatakdang ipaawtopsiya pagtino sa namatyan niini. (BANATNEWS)