Gikasab-an kay nanguyab misuway'g hikog

CEBU, Philippines - Usa ka dalagita kinsa gikasab-an sa ginikanan tungod sa sayo nga pagpanguyab nakadesider sa paghunos unta sa iyang kinabuhi pinaagi sa pagbitay apan nasalbar ra gihapon kini didto sa ilang balay sa barangay Tunghaan, lungsod sa Minglanilla sa miaging gabii.

Sa pakighinabi sa Banat News ni PO1 Edwin Camota sa Minglanilla Police Station, kini mibutyag nga ang misuway og hikog, l5 anyos pay edad kinsa namatikdan sa mga ginikanan nga may uyab na kini.

Gumikan kay gusto sa ginikanan nga makalampos sa pag-eskuyla, gimaymayan kini ug gipahimangnoan nga ang pagpanguyab og sayo dili maayo kay makabalda kini sa pag-eskuyla.

Unya wala usab kuno kini motubag-tubag, ug wala magpakita nga nasuko sa iyang mga ginikanan ang maong dalagita.

Apan malagmit nasakitan ug nahiubos kay gimaymayan, mihilom kini pagsulod sa iyang lawak ug wala na gyud mogawas.

Busa gibati og kabalisa ang iyang inahan nga maoy hinungdan nga gipugos niini ang pag-abli sa sira sa lawak kay wala man gyud kini mangabli dihang gituktok ug gisangpit sa inahan.

Apan nakurat nalang ang inahan sa pagsulod niini sa lawak kay maoy misugat sa iyang mga mata ang nagkumbabit na niyang anak.

Kansang liog gibitik sa tumoy sa habol nga ang pikas tumoy didto sa ilang sagbayan igaid.

Busa dali nga gitangtang sa inahan ang habot nga gilikos sa liog sa dalagita ug dihadiha gihatod kini sa Minglanilla District Hospital.

Apan tungod sa katalandugon sa kahimtang gihatod kini ngadto sa Vicente Sotto Memorial Medical Center.

Ang kapolisan namasin nga maulian ra ang maong dalagita. – BANAT NEWS