Vidal miawhag sa taga Tangke nga mag-honest

CEBU, Philippines - Ang mga molupyo sa barangay Tanke, dakbayan sa Talisay ug ang mga opisyal sa siyudad giawhag sa Arsobispo sa Sugbo nga si Ricardo Cardinal Vidal nga i-practice ang honesty o pagkamatinud-anon ug pagkasinsero sa ilang inadlaw-adlaw nga pagpakabuhi sama sa gibuhat ni Hesus Kristo sa iyang panahon niadto.

Ang Arsobispo kinsa maoy mipahigayon og misa diha sa bag-ong gi-renovate nga 88-anyos nga kapilya sa Santa Cruz kagahapon sa buntag atol sa iyang homily misulti sa maong awhag.

“Si Hesus available bisa’g asa, walay gipili. Approachable ug walay kaaway, matinud-anon ug dili magpakaaron-ingnon, ug magpuyo nga matinud-anon ug sinsero”, ni Vidal pa.

Kagahapon maoy unang adlaw sa pagtaak ni Vidal diha sa Tanke nga usa sa mga barangay sa Talisay diin gikatahong ubay-ubay sa mga molupyo niini nga nalambigit sa ilegal nga drugas.

Ang Tanke usab usa sa siot kaayong barangay sa Talisay diin kasagaran sa mga nanagpuyo giingong mga kabus kaayo.

Si Padre Juditho “Boboy” Rosende, resident priest sa Santa Cruz chapel nagkanayon nga espesyal gyud nilang giimbitar ang Arsobispo aron maoy mo- blessing sa kapilya aron kahatagan pa gyud og significance ang kalihukan ug aron usab madasig ang mga Tankehanon sa pagkarelihiyoso.

Si Padre Rosende nagtuo nga ang nahisgutang kapilya maoy mahimong instrumento nga ang mga katawhan sa lugar mahibalik sa hustong direksiyon. (BANAT NEWS)