Ombuds-Visayas mohatag kopya sa ZTE-NBN investigation

CEBU, Philippines - Si Assistant Ombudsman for the Visayas Virginia Santiago mipahibalong mahimong makapangayo og kopya ang publiko sa desisyon ni Ombudsman Merceditas Gutierrez sa kontrobersiyal nga imbestigasyon labot sa US$329 million ZTE-NBN deal nga nagpakawalay sala kang presidente Gloria Arroyo ug sa iyang bana nga si First Gentleman Mike Arroyo.

Matud pa ni Santiago nga ang rason sa paghatag sa maong kopya gikan sa Ombudsman Manila kini aron bisan lokal nga media makatuki sa maong isyu.

Gipasabot ni Santiago nga dili pa kini final sanglit mahimong ma-refile ang maong kaso diha gihapon sa buhatan sa Ombudsman aron mapahigayon ang laing imbestigasyon aron magklaro sa pagkwestyon sa mga kritiko ni Arroyo ilabina nga mokanaog na sa Malacañang si Arroyo ug maglingkod na lamang isip kongresista sa probinsiya sa Pampanga.

Iyang gitataw nga dili mahitabo ang double jeopardy sa maong kaso sanglit wa pa kini masang-at ngadto sa korte ug wala pay arraignment sa mga namatud-ang sad-an ug angayan mag-atubang og criminal ug administrative case.

Dugang pa ni Santiago nga ang bisan kinsang mga yanong mga magbubuhis mahimo usab nga makaapelar sa administrative case batok kang Arroyo ug mga kaubanan ngadto sa Court of Appeals samtang ang criminal case mahimo usab kining iapela ngadto sa Korte Suprema. (BANAT NEWS)