CEBU, Philippines - Usa ka polis gipasanginlan nga nangulata ug nagpabuto atol sa despidida party sa Quijano Compound ,barangay Guadalupe, dakbayan sa Sugbo kagahapon sa kaadlawon.
Siya mao si PO1 Daniel Masecampo kinsa nadestino sa Police Station 1 nga mao ang Waterfront Police Station.
Ang mga biktima mao sila si Joshua Jacalan ug Samuel Quijado pulos 22-anyos ug molupyo sa maong lugar.
Sa pakighinabi sa Banat News ni PO2 Melvin Jimenez mibutyag nga ang mga biktima giimbitar sa ilang higala nga nagpuyo sa maong lugar alang sa usa ka despidida party.
Apan sa tunga-tunga sa ilang kalingawan, ang higala sa polis nangita sa iyang tsinelas unya kalit lang mipasangil ngadto sa mga biktima nga matud pa maoy nanghilabot sa iyang tsinelas. Dihang gihimakak sa mga biktima ang pasangil, mihiwasa ang higala sa polis ug didto nahitabo na ang tension.
Samtang si Masecampo kinsa gikatahong wala makapugong sa iyang gibati, mipabuto usab sa iyang wala pa matino nga klase sa armas.
Sa maong panghitabo ang duha ka biktima dali usab dayong midangop sa Guadalupe Police Station aron magpa-blotter samtang si Masecampo wala na igkita. Ang hepe sa Cebu City Police Office (CCPO) nga si Senior Superintendent Patrocinio Comendador mibutyag nga ilang imbestigahon ang gibuhat ni Masecampo kung aduna bay kamatuoran ang maong mga pasangil sa duha ka biktima.
Dugang pa ni Comendador nga ila pang gipa-abot nga motungha si Masecampo tungod kay wala pa mopatim-aw human sa maong hitabo
Nasayran usab nga si Masecampo giingong nalambigit kaniadto sa paggamit og ginadiling drugas tungod kay positibo kini sa gipahigayong surprise drug test nga gihimo sa Cebu City Police Office (CCPO). (BANATNEWS)