CEBU, Philippines - Gigulgol ang liog ug namatay ang usa ka taxi driver human kini gitulis ug napalgan sa mga residente sa sitio Basbas sa barangay Pagsabungan dakbayan sa Mandaue sa milabay’ng gabii.
Ang biktima mao si Eliezer Parilla, 48, minyo ug lumad sa barangay Poblacion lungsod sa Medillen, usa ka taxi driver nga nagmaneho sa Joycelemar Taxi.
Sa pasiunang imbestigasyon sa Investigation and Detective Management Branch sa Mandaue City Police Office nasayran nga alas-11:30 sa milabay’ng gabii pipila ka mga residente sa maong dapit nakakita og usa ka taxi nga nag-parking sa ngitngit nga dapit.
Sa kahibulong sa mga tawo ilaha kining gisusi ug mao nalay ilang nakit-an ang taxi driver nga anaa sa back seat sa maong sakyanan ug nagkadugo hinungdan nga mitawag sila sa kapolisan.
Sa pagresponde sa kapolisan sa IDMB nasuta nga gigulgol ang liog sa biktima ug gituohang gitulis kini sa wala pa patya sa wala pa mailhing mga mamumuno.
Sumala pa ni PO1 Melvin Pelayo sa pakighinabi sa Banat News nga unang nakamatikod sa maong sakyanan mao ang usa ka habalhabal driver gumikan kay nagsiga ang hazard lights niini.
Base sa pagsusi sa sulod sa sakyanan gituohang dili lamang usa ka tawo ang mihimo sa maong krimen ug misukol usab si Parilla sa mga tulisan.
Samtang wala na usab ang cellphone ug pitaka ni Parilla, usa ka kutsilyo usab ang napalgan diha sulod sa sakyanan.
Dugang pa ni Pelayo nga aduna pay timailhang buhi ang biktima sa pag-responde sa mga polis hinungdan nga gidala kini sa Mandaue City District Hospital apan gideklarar kining dead on arrival.
Nagduda usab ang kapolisan nga sa laing dapit kini gitulis ug gipatay ug diha lang sa maong dapit gidala ug gibiyaan sanglit walay nadungog nga bisan usa ka komosyon diha sa maong dapit.
Ang kapolisan usab padayon ang ilang pagpahigayon og imbestigasyon alang sa pag-ila sa mga responsable sa maong krimen. (BANATNEWS)