Pintor gipusil sud sa balay

CEBU, Philippines - Patay ang usa ka lalaki human mapusili sa usa ka wala mailhing tawo sa lungsod sa Pinamungajan sa gabii niadtong nakalabay’ng adlaw.

Ang biktima mao si Alex Jacamos, 34, trabahante sa usa ka construction company isip usa ka pintor ug taga sitio Sta. Cruz, barangay Sacsac lungsod sa Pinamungajan.

Matud pa ni PO2 Salvador Samillano, Police Community Relation sa Pinamungajan dihang nahinabi sa Banat News diha sa sulod sa ilang ang biktima uban sa iyang pamilya nahitabo ang pagpamusil.

Naglingkod ang biktima sa ilang sala samtang nanabako dihang nabati nila ang usa ka buto sa armas ug naigo si Jacamos sa tuong bahin sa iyang liog ug diha-diha nalup-og.

Patay nang miabot sa Pinamungajan District Hospital si Jacamos. Sumala pang PO2 Samillano ang asawa sa biktima nga si Helen wala masayod kun may nakaaway ang iyang bana. – BANAT NEWS