Libreng sakay gustong ipasusi sa konseho
CEBU, Philippines — Paimbestigaran pa ni Konsehal Pastor “Jun” Alcover Jr. implementasyon sa Libreng Sakay Program tungod sa nagbalik-balik nga mga reklamo nga adunay mga modern public utility jeepneys (PUJ) nga padayung dili magpasakay og mga pasahero ilabi sa mga 01K nga mga jeep atol sa peak hours.
“Unsa may pulos sa Libreng Sakay kung ang mga pasahero nga angay unta makabenepisyo niini dili man gani pasakyon?”, pangutana pa ni Alcover basis a mga reklamo nga iyang nadawat gikan sa mga apektadong pasahero nga gibalibaran sa mga drayber.
Sa paglusagd sa programa niadtong Hulyo 2025 ug unom ka operators ang nisalmot. Ang libreng sakay magsugod sa alas 6:00 hangtod alas 9:00 sa buntag ug alas 5:00 sa hapon hangtod alas 8:00 sa gabii.
Niadtong panahona, gibanabanang mokabat sa P350,000 kada adlaw ang inisyal nga subsidiya sa gobyerno, uban ang target nga makaserbisyo og 20,000 ka pasahero.
Apan pipila lang ka semana human sa paglusad, mitumaw na ang mga reklamo bahin sa mga drayber nga gialegar nga molikay sa mga pasahero, molaktaw og biyahe ug dili regular nga mopasada sulod sa gikatakdang oras.
Adunay mga taho nga niadtong Septiyembre 2025, 50 lang sa 100 ka sakyanan ang kanunay nga makita nga nagbyahe sa kadalanan.
Niadtong Pebrero 2026, nagpahibalo ang Department of Transportation (DOTr) nga mopahigayon kini og imbestigasyon human makadawat og mga reklamo bahin sa kakuwang sa sakyanan nga mobyahe.
Sa pinakabag-ong insidente karong Nobyembre 2026, mikatap sa social media ang video nga nagpakita sa mga pasahero nga naghuwat sa gitakdang loading area sa Barangay Mabolo samtang ang pipila ka modern jeepney nga apil sa programa igo lang nga milabay ug wala pasakya ang mga pasaherong naghuwat.
Tungod niini, nagpagawas ang Land Transportation Franchising and Regulatory Board (LTFRB) Region 7 og Show Cause Orders nga gipetsahan Oktubre 31, 2026, batok sa duha ka transport groups.
Si Alcover miingon nga gikan sa alegasyon pa lang, kinahanglan nga tagdon ug imbestigaran ang mga reklamo kay katungod sa publiko nga makadawat og klarong tubag bahin sa paggamit sa pundo sa gobyerno.
Giawhag sab ni Alcover ang konseho nga susihon sa Committee on Transportation ang implementasyon, monitoring ug pagpatuman sa mga lagda sa programa sukad pa sa pagsugod niini niadtong Hulyo 2025.
Nangayo sab si Alcover og mga dokumento sama sa kompletong listahan sa mga transport operator ug accredited vehicles, deployment schedules, GPS records, aktuwal nga mga biyahe, kantidad sa pondo nga gigahin ug gibayad sa mga operator, kopya sa Show Cause Orders ug resulta o kahimtang sa hearing niadtong Nobyembre 12.
Matud pa ni Alcover nga kinahanglan masayran kon gituyo ba ang insidente o adunay ba’y mas lawom nga problema sa pagpatuman ug pagmonitor sa programa.
Isip kabahin sa iyang hangyo, nagpatawag si Alcover og executive session uban sa mga opisyal sa DOTr, LTFRB Region 7, Land Transportation Office (LTO), Cebu City Transportation Office (CCTO), ug mga representante sa duha ka transport operator aron nga mahatagan og katin-awan ang mga reklamo, madungog ang habig sa mga hingtungdang ahensiya ug operator, matino ang mga nahitabo ug makuha ang gikinahanglang impormasyon alang sa paghimo og mga lakang nga makapalig-on sa implementasyon, monitoring ug pagpatuman sa Libreng Sakay Program. (BANAT NEWS)
- Latest















