CEBU, Philippines - Konpirmadong patay ang usa ka bata human kini nalatayan og prime mover niadtong milabay’ng adlaw samtang nanguryoso sa nahitabong sunog sa barangay Tinago sa maong adlaw.
Ang namatay mao si Roldan Dilan, 2, ug naangol ang iyang tulo ka igsuon nga sila si Jessalyn Dilan, 8, Jasmine Dilan, 7, Jeralyn Dilan, 5 ug ang ig-agaw niining si Lea Jane Mandalunes, 5.
Matud pa ni Manuel Tagaan sa Record Section, sa Cebu City Traffic Division, sa dihang nahinabi sa Banat News, nalatayan gyud ang batang si Dilan.
Gisuwayan pagdala ang bata sa Vicente Sotto Memorial Medical Center apan gideklarar kining dead on arrival. Gikataho nga wala pay mga tagtungod ang mitungha sa maong tambalanan.
Samtang ang mga igsuon niini ug ang ig-agaw nga mga naangol, gidala sa Cebu City Medical Center (CCMC) ug gikatahong luwas na sa kakuyaw.
Ang prime mover nagtangag sa plakang GWB-245 nga gimaneho ni Rodrigo Salvador, 31, nga taga North Reclamation Area ning dakbayan.
Ang maong trak padulong sa M.J. Cuenco Avenue ngadto sa dalan Palma apan sa pagliko niini, wala mabantayi nga ang lima ka bata milabang hinungdan nga nabanggaan sila ug si Roldan nalatayan.
Kasamtangang gitanggong si Salvador sa Traffic detention cell ug gipaabot pa ang tukmang kaso nga ipasaka batok kaniya. – BANAT NEWS