CEBU, Philippines - Ang kapolisan sa lungsod sa Minglanilla maoy nanangtang sa mga campaign material nga naghitak sa maong lungsod agi og pagtuman sa mando sa ilang labaw’ng opisyal sa Provincial Regional Office (PRO)-7.
Si Chief Inspector Jovito Canlapan mibutyag sa Banat News kagahapon nga siya maoy nanguna sa linangkatay sa mga poster, streamer ug tarpaulin nga gipapilit sa mga koral, poste sa kuryente, kahoy ug uban pang kapapitlan.
Ang iyang kauban mao ang mga off-duty nga polis kinsa migamit sa bakante nilang adlaw sa pagsanong sa mando sa ilang labaw.
Matud pa ni Canlapan nga gisentro nila ang mga barangay Lipata ug Tungkop kansang mga tulunghaan nabulit sa mga gipapilit nga mga campaign material.
Hinuon nakaingon si Canlapan nga mas hamugaway ang ilang trabaho kay malinawon man ang milabay’ng piniliay sa ilang lungsod busa wala kaayo maglabad ang ilang ulo. Samtang didto sa dakbayan sa Talisay nga silingan sa Minglanilla, mga estudyante ug dili polis ang nanangtang sa mga campaign material.
Hinuon tungod kay ubos sila sa summer job program sa lokal nga kagamhanan, wala mausik ang ilang paghago sa linaksiay sa mga materyales nga politikanhon kay may suhol man silang mapaabot gikan sa kagamhanan sa dakbayan.
Si Konsehal Shirley Belleza miawhag sa mga molupyo nga motabang nalang sa pagpanglimpyo sa mga koral, mga poste ug kahoy nga anaa sa ilang palibot nga gibulitan sa mga poster ug uban pang campaign materials.
Kini aron sa pagsiguro nga mahinlo ang dakbayan karong human na ang eleksyon. – BANAT NEWS