Roxas masaligong makaapas tungod sa 2 milyones botos sa Visayas

CEBU, Philippines - Gipahibalo ni Commission on Elections Commissioner Gregorio Larrazabal kagahapon nga nadawat na sa central server ang gi-transmit nga botos gikan sa Visayas nga giingong balwarte ni Liberal Party vice-presidential candidate Manuel "Mar" Roxas II.

Ang kampo sa LP masaligong ang maong mga botos maoy makatabang sa nagtinga karong ihap sa botos ni Roxas kontra sa higpit nga kaatbang karong si Makati Mayor Jejomar Binay kinsa nag-una karon sa partial ug official tally sa Comelec.

Wala hinuon ibutyag ni Larrazabal sa interbyu kaniya sa DzMM ang epekto sa pag-ihap sa maong mga botos. Dinhi sa Sugbu, si Roxas maoy nag-una batok kang Binay.

 “I cannot release. I have to apologize," matud pa niini sa report sa ABS-CBN News.

Ang ubang dapit sa kabisay-an nga miabot na ang mga COC naglakip kini sa Western Samar ug Southern Leyte diin dunay kinatibuk-ang 254 ka mga COC ang gikatakdang ihatod ngadto sa National Board of Canvassers.

Samtang si Roxas miawhag ni Binay nga dili una mangangkon og kadaogan samtang nagpadayon pa ang lumba sa pagka bise presidente.

Si Roxas malaumon nga siya ang modaug sa higayon nga ma-canvass na ang iyahang mga balwarte.

Samtang si Butch Abad, LP campaign manager ni Roxas, miinsister sa interbyu sa dzMM nga dili pa tanang boto sa Visayas ang na-transmit.

Matud pa niini nga 30 porsiyento sa resulta gikan sa mga probinsya sa Kabisay-an wala pa madawat sa Comelec, sumala pa niini nga dako kini og epekto sa nagpadayong eskotenyo.

Sa gipagawas nga statement kagahapon, si LP senatorial campaign manager Sen. Francis Pangilinan nagkanayon nga dili dawaton sa partido ang kapildihan hangtud nga dili maihap ang tanang botos sa Kongreso.

Ang LP nangangkong nag-una si Roxas kang Binay sa margin nga 2 milyones botos sa central ug western Visayas.

Apan ang kampo ni Binay masaligon usab nga base sa ‘trend’ sa eskotenyo dako ang ilang pagtuong ang mayor sa Makati maoy motumaw nga mananaog.

Sa partial ug unofficial tally sa GMA News alas 12:30 kagahapon si Binay nag-una gihapon kang Roxas pinaagi sa iyang nakuhang 13,489,293 samtang si Roxas nakakuha lamang og 12,679,151 botos.   (BANATNEWS)