CEBU, Philippines - Usa ang patay ug 15 ang naangol sa dihang nabangga ang multicab nga nawad-an og preno sa dulhugon nga bahin didto sa Sitio Cabulihan, barangay Bali-ang, siyudad sa Danao kagahapon sa alas 4:30 sa kaadlawon.
Ang namatay dihadiha mao ang asawa sa drayber nga si Marilou Capol, 45, taga barangay Sta. Rosa samtang kritikal ang kahimtang sa bana niining drayber sa Suzuki multicab kolor puti nga si Danilo Capol, 40.
Ang ubang mga paryente nga naangol nga sakay sa multicab mao sila si Analou Dechyos Labador, 15, Tessa Mae Capol, 16, Rinz Carl Labador, 11, Mark Castillo, 24, Mardy Capol, 17, pulos molupyo sa Sta. Rosa, Jay Rica Enriquez, 12, taga Cambiohan, Danao, Allan Labador, 36, taga Sta. Rosa, Armando Labador Jr., 16, Dennis Castilo, 16, John Roe Enriquez, 16, Mercedez Castillo, 59, Dayalou Capol, 15, Jeya Rynn Enriquez, 11, ug Khesia Capol, 8 ug pulos molupyo sa Sta. Rosa.
Matud ni PO1 Rommel Costan, traffic investigator sa Danao City Police Station sa dihang nahinabi sa Banat News nga ang multicab gikan sa Bali-ang Proper human mitambong og last counting.
Apan pag-abot sa dulhugon nga bahin sa maong lugar kalit lang nawad-an og preno ang sakyanan hinungdan nga naratol ang drayber ug gibangga na lang niya kini sa poste sa kuryente sa daplin sa karsada aron dili sila mahulog sa lawom nga pangpang.
Ang asawa niini nga si Marilou Capol nga diha sa frontseat patay dihadiha human napiit sa napiyaping dulong sa sakyanan ug nabali ang liog sa drayber ug nangalamba ang tanang sakay ug ang uban natagak.
Daling gihatod sa Danao City District Hospital ang mga biktima apan patay na si Marilou ug gibalhin sa tambalanan sa dakbayan sa Sugbo sa grabing bun-og ug pangos sa kalawasan ug gika-report nga grabe ang kahimtang sa drayber. – BANAT NEWS