Kanhi organizer sa BOPK mitapon ni Palcuto

CEBU, Philippines - Kanhi organizer sa Bando Osmeña Pundok Kauswagan sa south district adto na misuporta kang independent vice mayoralty candidate Rico Palcuto uban sa iyang mga miyembro gikan sa amihanan ug habagatan bahin sa dakbayan.

Si Narcisa Tiro, 39, nga gikahinabi sa Banat News mipakita sa iyang dokumento kaniadtong 2007 elections usa siya sa mga poll watchers ni Mayor Tomas Osmeña.

Apan gumikan sa mga nanghitabo krimen nga gihulagway niyang peligroso na alang sa usa ka yanong tawo ang paglakaw-lakaw sa kadalanan dako ang iyang pagtuong si Palcuto ray makasulbad niini.

Si Tiro nabiktima na sa pagpanglabni diha sa dalan N. Bacalso pipila ka bulan na ang milabay ug hangtud karon matud pa niya nga wala gihapon mailhi ang kawatan.

Isip usa ka yanong tawo, si Tiro nagkanayon nga gusto lamang niyang suportahan ang maayong plano ni Palcuto alang sa dakbayan ilabi na ang pagputol sa kriminalidad.

Nag-una sa plataporma ni Palcuto ang peace and order sa dakbayan gumikan kay napanglantawan niining kini maoy yawe sa kalamboan sa usa ka dapit tungod sa madaning mga negosyante.

“Ang amoa, naningkamot mi kutob sa among mahimo pagdani sa ubang mga tawo nga pilion ang kandidatong makahatag og tiunay nga serbisyo sa mga Sugbuanon,” pasabot pa niini.

Dako usab iyang pagtuong bisan usa lamang ka termino dako na og mahimo si Palcuto sa dakbayan. Si Palcuto kanhi opisyal sa kapolisan ug taas na ang kasinatian sa pakigkombate sa kriminalidad.

Kagabii, gilusad ni Palcuto ang ‘miting de abanse’ diha sa ilang headquarters sa Banilad nga gitambungan usab sa ilang mga supporters.    (BANATNEWS)