Miting de abanse ni Jonas nagubot

CEBU, Philippines - Nagubot ang miting de abanse sa Liberal Party sa dakbayan sa Mandaue nga gipangulohan sa ilang standard bearer nga si Mayor Jonas Cortes tungod sa paglinarotay og buhok sa duha ka mananaog sa Miss Mandaue 2010 niadtong milabay’ng gabii.

Ang gikatahong nagbugno mao sila si Sharon Grace Angel nga midaug isip 3rd runner up ug ang gikabugno mao si Karina Nikko Gajudo nga maoy naghupot karon sa titulong Miss Mandaue 2010.

Si Dexter Alazas,manager ni Angel nga nahinabi sa Banat News miingon nga ang panagbugno nagsugod lamang sa panaglalis nga ang hinungdan mao ang pagpasangil ni Karina ngadto kang Sharon nga nagmugna og dili maayong estorya.

Dugang pa niya nga gisukmatan si Sharon ni Karina nga miresulta sa pagbinunlotay sa buhok apan dali lamang hinuon nga napakgang sa pipila ka mga kauban nila.

Wala hinuon maklaro kun si kinsay unang milarot og buhok nilang duha apan napakgang kini dayon.

Si Alazas miingon nga didto ang lima ka mga mananaog sa Miss Mandaue 2010 alang sa ilang pagpasundayag atol sa ‘miting de abanse’ ni Cortes.

Matud pa ni Dexter nga nagpakurasyon si Sharon sa Mandaue City Hospital human sa maong hitabo ug giatubang sila sa unang ginang sa dakbayan nga si Sarah Cortes ug gipaminaw ang matag habig ug mipadayag sa kasagmuyo sa maong hitabo.

Gisuwayan og kontak sa Banat News si Karina apan matud pa sa usa ka sinaligan nga tinubdan nga dili pa kini buot patingogon sa committee sa Miss Mandaue pageant.

Samtang ang committee chairman sa nahisgutang indigay nga si Clarence Sanchez nagkanayon nga wala siya masayod sa maong hitabo .

“Wala man gud ko katambong sa meeting de abanse, maong wa gyud ko kabalo anang butanga,” nagkanayon si Sanchez dihang gitawgan sa Banat News.

Samtang ang public information officer sa dakbayan sa Mandaue nga si Roger Paller mipadayag nga personal ang panagbangi sa duha ug wala kini koneksyon sa maong indigay ug sa miting de abanse sa mayor.

“Wala man maglambigit sa indigay ang maong panag-away sa duha kay personal man na nila nga kasungian. Above board ang pagpili sa top five nga mananaog gikan sa mga inila usab nga board of judges niini,” sumala pa ni Paller.  (BANATNEWS)