Mibali nga BOPK leaders 'way apil sa ihap'-bitang

CEBU, Philippines –  Gipakagamay lang sa usa ka barangay lider sa Bando Osmeña Pundok Kauswagan diha sa barangay Pasil ang pagbali sa siyam ka mga kanhi BOPK leaders sa south district ngadto na sa Kugi Uswag Sugbu.

Si Mario Bitang, usa sa mga lig-ong lider sa BOPK sa Pasil sa pakighinabi sa Banat News nagkanayon nga walay epekto kang Mayor Tomas Osmeña ug sa partido ang pagbali sa siyam.

Matud pa niini nga ang namalhin dili mga bug-at nga lider sa BOPK kay sila makonsiderar nga ‘way apil sa ihap’ tungod kay sila gagmay lamang nga lider nga gustong magpatagad sa BOPK.

Sumala pang Bitang, sa pagkatinud-anay mas daghan ug mas dagkong lider gikan sa Kusug niadtong 2007 elections ug sa pagkaparot na kang Jonathan Guardo sa south district ang mibalhin sa BOPK. “Dili sila considered nga dagkong lider sa BOPK, nibali ra na sila aron matawag nga duna sad silay participation karong eleksyon,” sumala pang Bitang. Sila mao si Kagawad Sammy Gabutan sa Guadalupe, Kagawad Ronnie Abejo sa Pasil, Jerome Jaca ug Rodrigo Ocampo sa Inayawan, Nardo Gabisay sa Babag, senior citizen president Cris Dayunot sa Mambaling, youth leader Nicolas Vejel Ong sa Basak-San Nicolas, Rey Kintanar sa Cogon, laing youth leader Bionca Montalez sa Buhisan, ug Alfon Caballes nga bise-presidente sa kapunungan pagduso sa barangay Banawa-Englis.

Ang siyam mipadayag sa ilang pagbiya kang Osmeña ug adto na mosuporta kang Guardo pagka-kongresista sa habagatang distrito sa siyudad.

Gihimakak ni Bitang nga dili na makaya sa mayor tungod sa giagiang sakit niini sa kanser kun mahimo kining kongresista, samtang gipanalipdan usab ni Bitang ang katakos ni Osmeña nga makadumala og distrito base usab sa kasinatian sa mayor pagdumala sa siyudad. (BANATNEWS)