Lalaki 3 ka adlaw patay nanimaho

CEBU, Philippines - Usa ka lalaking gituohang kapin tulo na ka adlaw’ng patay nga nadugta na ug nanimaho sulod sa usa ka lawak sa Mendoza Apartment sa dalan Borbajo sa barangay Talamban pasado alas-3 sa hapon sa miaging adlaw.

Ang maong lalaki nailhan nga si Albert Lastimoso, 25, molupyo sa Palmas Verdes, barangay Tabok syudad sa Mandaue.

Ang tag-iya sa maong apartment nga si Villa Mendoza padulong na untang mogawas sa ilang panimalay sa dihang natimahoan niini ang grabe ka langto nga baho.

Tungod niini, iyang gisubay diin kini maggikan hangtud naabot siya sa lawak nga giabangan sa usa ka Adelfa Lim nga kanhi hinigugma ni Lastimoso.

Sa iyang pagkakuryoso iyang gi-ablihan ang maong lawak ug mao nalay iyang nakita ang usa ka lalaking naghigda ug milagom ug nanimaho hinungdan nga mitaho siya ngadto sa kapolisan.

Samtang sila Lornie Cabiñete ug Grace Mae Tangub mibutyag sa kapolisan nga niadtong Abril 27 ning tuiga ilang nahimamat ang biktima kini human nangayo kanila og kopya sa yawe sa lawak ni Lim.

Apan wala nila kini hatagi, apan nasayran na lang nilang nakasulod na kini sa lawak ni Lim.

Si Lim usab sa iyang bahin mibutyag sa kapolisan nga duna silay kasabutan sa iyang kanhi uyab (namatay) nga mao kini moalima sa iyang binuhing iring tungod kay mibisita dinhi sa Sugbu ang iyang Japanese fiancée.

Sa pakighinabi sa Banat News ni PO2 Jodan Batucan giingong best friends nalang ang duha ug dugay nang nagbuwag. Wala say nakitang may foul play sa kamatayon niini ug wala sad magkayamukat ang mga butang sa balay. – BANAT NEWS