P3 milyones pangandam kun dunay brownout

CEBU, Philippines - Migahin og P3 milyones nga budget ang Cebu City Treasurer’s Office alang sa pagpangandam sa posibleng pagkunhod sa pundo sa elektrisidad para sa umaabot nga piniliay karong Mayo 10.

Adunay giandam nga tag napulo ka mga emergency lights sa matag presinto nga magamit kun ugaling dunay brownout.

Ang Visayan Electric Company kon VECO miklarong aduna na usab silay pagpangandam nga gihimo, adunay 560 ka mga clustered precincts sa dakbayan sa nagkadaiyang eskwelahan.

Gisiguro hinuon sa Comelec nga dili maapektuhan ang Precinct Count Optical Scan machine kun mag-brownout tungod kay duna kini awtomatikong built-in batteries nga molungtad og 16 ka oras.

Karong Mayo 3 hangtud 6 ipanghatod ang mga PCOS machines sa matag presinto ug isunod dayon ang pag-testing niini aron makurihian dayon ang kinahanglang kurihian sa dili pa ang Mayo 10.

Gawas sa nagpadayong voter’s education sa Comelec aduna say wide screen sa matag eskuylahan nga ibutang alang sa last minute voter’s education.

Giawhag sa Comelec ang mga botante pagsusi daan sa ilang mga presinto aron di na malangay pagpangita niini tungod kay bisan kun pareho ra kini og numero gi-clustered na kini karon.

Samtang ang kapolisan magbutang og duha ngadto sa tulo ka polis sa matag presinto aron masigurong walay kakulian o kagubot nga mahitabo. – BANAT NEWS