GMA nanawag ni Gwen para ni Gibo

CEBU, Philippines - Masaligon si Presidente Gloria Macapagal nga mo-‘deliver’ ang Sugbu subay sa gipanaad ni Gob. Gwendolyn Garcia kaniya alang sa kandidatora ni Lakas-Kampi CMD standard bearer Gilberto “Gibo” Teodoro.

Si Garcia nagkanayon nga mitawag kaniya si Arroyo kagahapon sa udto ug nakig-estorya kaniya sulod sa dili mominus 25 minutos ug nagpangutana kabahin sa dagan sa kandidatora sa gobernadora ug kang Teodoro dinhi.

Matud pa ni Garcia gikahimuot sa presidente ang resulta sa pagpangampanya uban ni Teodoro sa nagkadaiyang mga lungsod sa probinsiya sa Sugbu human mahibaw-ing gihangop sa mga Sugbuanon si Teodoro.

Dugang pa niini nga labing gikahimuot sa pangulo ang pasalig niya pinaagi sa One Cebu Party mo-deliver og usa ka milyon ka botos gikan sa Sugbu alang sa kandidatura si Teodoro susama sa nahatag sa Sugbu sa kadaugan ni Arroyo niadtong 2004 presidential election.

Wala hinuon motug-an si Garcia sa reaksyon ni Arroyo kabahin sa pamahayag ni Teodoro sa Dumanjug nga sa 2016 si Garcia na maoy ilang ituboy pagka-presidente sa nasud.

Matud pa ni Garcia nga ilang gitutukan karon nga masigurong makadaog si Teodoro sanglit mao lamang kini ang dunay klarong direksyon aron mapalambo sa nasud.

Gidayeg usab ni Garcia ang kahanas ni Teodoro pagpalupad sa helicopter nga ilang gisakyan sa ilang duha ka adlaw nga campaign sorties sa Sugbu tungod kay bisan gamay wala siya batia og kakulba bisan og may gamay kakulian sa panahon. – BANAT NEWS