Census himuon mayo 17 sa tibuok nasud

CEBU, Philippines - Ipahigayon sa National Statistics Office ang census sa mga tawo ug mga panimalay sugod karong Mayo 17 hangtud sa Hunyo 11.

Si Edwina Cariaga, statistician sa NSO-7 sa pakighinabi sa Banat News nagkanayon nga tuyo sa maong census ang pag-ihap dili lamang sa populasyon karon sa nasud kundili lakip na ang kahimtang sa ilang pagpuyo.

Matud pang Cariaga iapil sa pag-ihap ang mga edipisyo ug panimalay nga gipamuy-an sa mga tawo aron magamit isip basehanan sa mga magbabalaod alang sa pagpatuman sa ilang nagkadaiyang mga programa.

Ang NSO-7 mopakatap og 6,500 ka mga supervisors ug enumerators sa tibuok rehiyon aron maoy mohimo niini. Susama gihapong kalihukan ang buhaton sa ubang NSO offices sa tibuok nasud.

Niadtong 2007 ang labing uwahing census apan alang lamang kini sa populasyon ug walay labot ang mga panimalay. Matud pang Cariaga adunay medicate census matag tunga-tunga sa dekada apan mag-agad sa budget gikan sa nasudnong kagamhanan.

Lakip sa ihapon sa census ang mga transients kun nangabang lamang ug kadtong mga estudyanteng nagtungha sa usa ka lugar apan taga laing dapit kun dili sila magkanunayan og pauli sa ilang mga probinsya.

Samtang kadtong mga overseas workers nga wala na makauli sulod sa lima ka tuig dili na maapil sa census.

Ang Central Visayas adunay gibana-banang 6.4 milyones nga populasyon base sa census niadtong Agosto 1,2007. Ang Sugbu lakip na ang Metro Cebu adunay populasyong 3,848,919 samtang ang Cebu City adunay 798,809 nga populasyon. - BANAT NEWS