Dinakpan giposasan milayat namatay

CEBU, Philippines - Naugbok ang ulo ug patay diha-diha ang usa ka lalaking bag-o lang gidakop sa kapolisan ug pinosasan ang duha ka bukton human giingong miambak sa building gikan sa ikaduhang andana kagahapon pasado alas-2 sa kahaponon diha sa barangay Talamban ning siyudad.

Atol ning pagkutlo ning balita, wala pay bisan usa ka saksi ang mikumpirmar kun miambak ba gyud si Dexter Avila gikan sa ikaduhang andana sa building sa Talamban Arcade aron magpakamatay siya o ba kaha gusto lang untang mo-eskapo gikan sa mga polis nga mikuyog kaniya.

Si Avila, residente sa barangay Tipolo siyudad sa Mandaue ug school driver sa St. Jude Academy sa barangay Pitogo, lungsod sa Consolacion miangkong siya maoy mikawat sa pito ka computer units sa maong tunghaan sa miaging semana.

Matud ni PO3 Alex Sialana sa Consolacion Police Station nagpahigayon sila og follow-up kagahapon sa buntag kabahin sa kasong pagpangawat ni Avila ug ilahang gi-recover ang maong mga units sa gibaligyaan niini.

Sila si PO3 Sialana ug PO1 Nilon Suico maoy kuyog ni Avila nianang pasado alas-11 sa buntag misubay sa Villagonzalo 2 sa barangay Tejero ug ilang narekober ang Central Processing Unit nga nabaligya ni Avila.

Human niini midiretso sila sa Talamban Arcade ug gi-recover ang gibaligya niining LCD padulong na silang manakay sa patrol car dihang miingon si Avila nga kaihion kini ug kalit nga mibalik og saka sa ikaduhang andana.

 Tungod niini gigukod ni Suico si Avila apan wala niya kini maapsi apan iyaha kining nakit-ang kalit nga milayat paingon sa ubos.

Nagtuo ang mga polis nga wala sa plano ni Avila ang magpakamatay kondili buot lamang niining moikyas pinaagi sa paglayat sa gibana-banang lima ka metros nga gihabugon paubos.

Apan kay dili maayong pagkahimutang ang iyang posas naglisod kini pagpanukad sa pag-ambak ug nawad-an og balanse ug nalahos pagkatagak nga nag-una ang ulo padulong sa ubos nga nakaingon sa iyang kamatayon.   (BANATNEWS)