CEBU, Philippines - Gitakdang pasakaan og kaso ang usa ka polis nga nagpasalba sa iyang armas nga nakaigo sa tiil sa apo ni kanhi Mayor Alfredo “Pedong” Ouano sa dakbayan sa Mandaue sa miaging adlaw.
Si PO1 Marlowe Binangbang sa kapolisan sa Presinto 3 sa Basak Police Station sa Mandaue City Police Office kagahapon mibutyag sa Banat News nga giandam na sa abogado sa biktima nga si Adonis Ouano Icalina, 19, ang kaso nga ipasaka batok kang PO2 Benjamin Clloyd Yu, 34, ulitawo, nga nadistino sa Cebu Provincial Police Office (CPP0).
Dihang giimbistigar ni PO1 Binangbang, si Yu miangkon nga paingon siyang mapauli sa ilang balay sa Dona Rosario Village sa barangay Basak, sa maong dakbayan gikan sa iyang trabaho ug mihapit sa gasoline station sa maong dapit dihang nagkaabot kini ug ang biktima nga kauban sa mga barkada niini. Apan matud pa mikalit lang og kulisiw ang mga kauban sa biktima kay may nanitsit sa kauban niining babaye ug si PO2 Yu maoy gipasanginlan.
Si PO2 Yu nga wala mag-uniporme niadtong higayona wala hiilhi nga usa ka polis apan hugot nga mihimakak sa maong pasangil.
Apan bisan giunsa niya og pamalibad, gipikhan man hinuon siya sa kumo sa usa sa kauban sa biktima, sumala pa ni Yu.
Sa kakusog og kumo sa misukmag kaniya, si Yu giingong nahagba sa yuta ug sa kabalaka nga tiwasan siya, milanit siya sa iyang armas de fuego ug dihadiha mipasalba siya, apan ang bala mitaroy gyud sa tiil sa biktima.
Si P02 Yu nagtingkagol pa karon sa prisohan. – BANAT NEWS