CEBU, Philippines - Usa ang patay ug kritikal ang kahimtang sa angkas niining dalaga human magkadinasmagay ang motorsiklong ilang gisakyan sa gikasugat nga multicab sa sitio Sangi sa barangay Maghanoy lungsod sa Barili kagahapon sa ala 1:50 sa sayong kaadlawon.
Ang namatay mao ang drayber sa motorsiklo nga si Chierny Escorial, 29, molupyo sa Poblacion sa Dumanjug, samtang kritikal ang kahimtang sa angkas niining si Janice Gael Alquizalas, 22, taga barangay Bitoon, Dumanjug.
Samtang ang drayber sa gikadinasmagay nga close van multicab mao si Liberato Mascarinas, 35, taga barangay Minolos, Barili.
Matud pa ni SPO2 Zaldy Orillo sa Barili Police dihang nahinabi sa Banat News ang motorsiklo sa mga biktima gikan pa sa lungsod sa Dumanjug paingon sa Barili samtang ang multicab gikan sa tambalanan paingon nang mamauli sa barangay Minolos.
Gikatahong milihay sa libaong ang motorsiklo ug mikawat sa kasugat nga lane apan adto hinuon misampak sa kasugat nga multicab.
Daling gihatud sa Barili District Hospital ang mga biktima apan gideklarar si Escorial nga dead on arrival samtang si Alquizalas gilahos sa Vicente Sotto Memorial Medical Center.