Papa gipusil sa anak wala maigo

CEBU, Philippines - Usa ka hubog nga anak mipusil sa iyang amahan ug suwerte kay wala maigo ang naulahi didto sa sitio San Isidro, barangay Poblacion, lungsod sa Aloguinsan sa miaging gabii.

Ang gidibuwenas nga nakaeskapo sa bala sa kamatayon mao si Jesus Dialagdon, 63, nga taga San Isidro, usa ka retired worker sa Atlas Mining sa Toledo City, samtang ang miluthang kaniya, mao ang iyang anak nga si Richard Dialagdon, hingkod ang panuigon.

Sumala ni PO2 Eugene Taboada sa kapolisan sa Aloguinsan nga hubog nga miduaw sa balay sa iyang amahan ang suspetsado hinungdan nga wala kini padayona sa biktima.

Usa sa hinungdan matud pa ni Taboada nga wala pasudla sa amahan ang iyang anak, mao nga gawas nga kini lasbag, daan na silang nagkaaway sa dugay-dugay nang panahon  gumikan sa dili maayong taras sa suspetsado ilabi na kun makayarok og ilimnong makahubog.

Gumikan sa kalagot, gilanit sa suspetsado ang iyang armas de fuego ug sa walay kukahadlok gitirohan ang iyang amahan.

Suwerte na lang kay nakahupo ang biktima hinungdan nga wala kini maigo sa bala.

 Ang biktima mibutyag sa kapolisan nga ang iyang anak aduna’y pending nga warrant dinhi sa siyudad.

Sa pagkakaron gipangita pa sa kapolisan ang suspetsado kay mikabad kini og dagan human sa hitabo ug hangtod karon wala na kini magpakita pa didto sa maong lungsod. – BANAT NEWS