CEBU, Philippines - Si Liberal Party gubernatorial candidate ug kanhi Cebu City Councilor Hilario Davide III miawhag ni Gob. Gwendolyn Garcia nga dili nalang ihinayon ang kontrata sa Kapitolyo ug sa Korean Electric Power Company kon KEPCO nga adto itambak ang coal ash sa Balili Property sa Tinaan, sa Naga nga gipanag-iya sa lalawigan.
Kini human namatud-an sa pagtuon sa Philippine Institute of Pure and Applied Chemistry (Pipac) sa Ateneo de Manila University Campus sa Quezon City niadtong Enero 18, 2010 nga ang coal ash nga gipangtambak sa nagkadaiyang dapit sa Naga ug sa Pitalo San Fernando may delikadong kemikal sama sa arsenic, cadmium ug mercury nga makadaut sa kalikupan ug sa mga katawhan.
Miingon si Davide nga mas maayong kanselahon na lamang ni Garcia ang kontrata tali sa KEPCO nga diin mobayad ang maong planta sa lalawigan aron dunay malabayan sa ilang abo.
Lakip sa gustong ipawalay bili ni Davide sa Kapitolyo ang kontrata tali sa kagamhanan sa lalawigan ug sa pamilyang Balili sa pagpalit sa 98 milyones pesos nga lote sa Tinaan, Naga.
Gihulagway niining nahisama na nga namasura ang kagamhanan sa lalawigan sa Sugbu sa hugaw gikan sa KEPCO.
Matud pa ni Davide nga dili musalir ang pasiatab ni Gov. Garcia nga usa ka dakong revenue generation ang maong pagtukod sa international port sa dakbayan sa Naga sanglit ang bawos niini mao man ang kaalautan sa katawhan sa Sugbu.
Dugang pa ni Davide nga sa higayon nga mapili siya sa pagkagobernador iyang subayon ang tanang mga kwestiyonableng mga kontrata sa lalawigan partikular na sa kontrata sa KEPCO ug sa Balili. (BANATNEWS)